કોર્ટમાં માતા જુબાની આપતાં-આપતાં રડી પડ્યાં, કહ્યું- હું એક ડગલું વધી ત્યાં ગળું કાપી નાંખ્યું, ફેનિલ બધાને મારી નાંખવા ઇચ્છતો હતો…

કોર્ટમાં માતા જુબાની આપતાં-આપતાં રડી પડ્યાં, કહ્યું- હું એક ડગલું વધી ત્યાં ગળું કાપી નાંખ્યું, ફેનિલ બધાને મારી નાંખવા ઇચ્છતો હતો…

સુરતના પાસોદરામાં સ્થાનિક લોકોની હાજરી વચ્ચે સરાજાહેર ગ્રીષ્મા વેકરિયાની હત્યા કરવાના પ્રકરણમાં કોર્ટમાં ચાલી રહેલી ન્યાયિક કાર્યવાહી દરમિયાન ગમગીન દૃશ્ય સર્જાયું હતું. ગ્રીષ્માની માતા જુબાની દરમિયાન દીકરીને યાદ કરીને રડી પડ્યા હતા. થોડી વાર સતત આંસુ વહેતા રહેતા તેઓ કશું બોલી શક્યા નહોતા. જોકે, મન મક્કમ રાખી તેઓએ અશ્રુધારા વચ્ચે કહ્યુ હતું કે, હું એક ડગલું ચાલી અને દીકરીના ગળા પર ચપ્પુ ફેરવી દીધું હતું., તે તો અમને બધાને જાનથી મારી નાંખવા ઇચ્છતો હતો. સરકાર પક્ષે મુખ્ય જિલ્લા સરકારી વકીલ નયન સુખડવાલાએ સરતપાસ કરી હતી.

માસીના દીકરાએ શું કહ્યું?: ગ્રીષ્માની માતા ઉપરાંત ફેનિલની માસીના દીકરાએ કહ્યું કે, ફેનિલને સતત મોબાઇલ પર વેબ સિરિઝ જોવાની આદત હતી. નોંધનીય છે કે, ફેનિલે હત્યા બાદ માસીના દીકરાને ફોન કરીને કહ્યું હતું કે, તેણે ગ્રીષ્માને મારી નાંખી છે.

કુલ 100 સાક્ષીઓ થયા, આજે એફએસએલની જુબાની લેવાશે: ગત રોજ વધુ સાત સાક્ષી ચકાસાતા કુલ સાક્ષી ચકાસણીની સંખ્યા 100 થઈ હતી. હવે આજ (બુધવાર) રોજ પોલીસ અધિકારી ઉપરાંત એફએસએલ, મોબાઇલ કંપનીના મેનેજરની જુબાની લેવામાં આવનાર છે.

ગ્રીષ્માના ભાઈની જુબાની લેવાઈ હતી: થોડા દિવસો પહેલાં કોર્ટમાં ભાઇની જુબાની લેવાઈ હતી. સરકાર પક્ષે મુખ્ય જિલ્લા સરકારી વકીલ નયન સુખડવાલા સમક્ષ હત્યા અગાઉનું અને હત્યા બાદનું સમગ્ર ચિત્ર ગ્રીષ્માના નાના ભાઈએ કોર્ટ સમક્ષ રજૂ કર્યું હતું. ઘટનાને શબ્દો વડે તાજી કરતા ભાઇનું દિલ ભરાય ગયું હતું. તેણે કહ્યું કે, આરોપી જ્યારે સોસાયટીના નાકે ઊભો હતો ત્યારે તેને સમજાવવા ગયો તો ચપ્પુ પેટમાં મારવા જતા હું બચી ગયો, પછી તેણે ગ્રીષ્માને પકડી લીધી. અમે બચાવવા પહોંચીએ એ પહેલાં ચપ્પુ ફેરવી દીધું હતું.

મૃતક ગ્રીષ્માના કાકાની જુબાની લેવામાં આવી: ટ્રાયલ દરમિયાન હત્યા સમયે હાજર ગ્રીષ્માના કાકાની જુબાની લેવામાં આવી હતી. સરકાર પક્ષે મુખ્ય જિલ્લા સરકારી વકીલ નયન સુખડવાલાએ સરતપાસ કરી હતી જ્યારે આરોપી પક્ષે એડવોકેટ ઝમીર શેખે ઉલટ તપાસ કરી હતી.

ફેનિલ કારની ચોરીમાં પણ પકડાયો હતો:
એક સાક્ષીએ કોર્ટમાં કહ્યું કે, ફેનિલ અગાઉ કાર ચોરીના કેસમાં પકડાયો હતો. પોલીસે તેની અટક કરી હતી. તેણે કહ્યું કે, ગ્રીષ્માના ઘરવાળા જ્યારે આવ્યા, ત્યારે હું પણ ગયો હતો અને ફેનિલને સમજાવવાનો પ્રયાસ કર્યો હતો. હું ગુસ્સે પણ ભરાયો હતો.

ઘટના શું હતી?:
સુરતમાં કામરેજના પાસોદરામાં ગત 12 ફેબ્રુઆરીના રોજ ગ્રીષ્મા વેકરિયાની એક તરફી પ્રેમમાં પાગલ ફેનિલ ગોયાણીએ ગળું કાપી ઘાતકી હત્યા કરી હતી. ત્યારબાદ હાથની નસ કાપી અને ઝેરી દવા પીવાનું નાટક કરી આપઘાતનો પ્રયાસ કર્યો હતો. ગ્રીષ્માની હત્યા કરનારા આરોપી ફેનિલને હોસ્પિટલમાંથી રજા મળતા પોલીસે કોર્ટમાં રજૂ કરી રિમાન્ડ મેળવ્યા હતા. રિમાન્ડ પૂર્ણ થતા જ્યુડિશિયલ કસ્ટડીમાં ખસેડાયો હતો. હાલ ફેનિલ લાજપોર જેલમાં બંધ છે.

GujaratPress

Related articles

Leave a Reply

Your email address will not be published.